मलेसिया जाने श्रमिकका लागि २५० म्यानपावरको नयाँ पूर्वस्वीकृति प्रक्रिया तत्काल रोकियो

२८ भदौ, काठमाडौं। सरकारले मलेसिया श्रमिक पठाउने २५० म्यानपावर कम्पनीको नयाँ पूर्वस्वीकृति तत्काल रोक्का गरेको छ । विदेशी श्रमिक केन्द्रीकृत व्यवस्थापन प्रणाली (एफडब्लूसीएमएस)मा मुख्य श्रमिक भर्ना संस्थासँग आबद्ध वा सहयोगी रहेका संस्थाको पूर्वस्वीकृति रोकिएको हो ।

वैदेशिक रोजगार विभागका अनुसार एफडब्लूसीएमएसमा मुख्य संस्थाका रूपमा सूचीकृत २५ संस्थाको कारोबार, छनोटको आधार, विगतको संलग्नता र अन्य संस्थालाई आबद्ध गराउने प्रक्रियाबारे छानबिन भइरहेको छ । साथै २५० संस्थासँग आबद्धताको आधार र सम्बन्धबारे स्पष्टीकरण मागिँदैछ । छानबिन पूरा नहुँदासम्म नयाँ पूर्वस्वीकृति दिइने छैन । तर श्रम स्वीकृति पाइसकेका श्रमिकको मलेसिया जाने प्रक्रिया भने प्रभावित हुने छैन । विभागले समूहगत नियन्त्रण, एकाधिकार वा प्रतिस्पर्धा सीमित गर्ने गतिविधि पुष्टि भए कानुनअनुसार कारबाही गर्ने जनाएको छ ।