पहिरोले सोलुखुम्बुको हुङ्गा खोला थुनियो, आसपासका बस्तीमा बाढीको जोखिम झन् बढ्यो

२६ भदौ, काठमाडौं । सोलुखुम्बुको महाकुलुङ गाउँपालिका–२ र ४ बीच पर्ने हुङ्गा (हुङ्कु) खोला पहिरो खसेर थुनिएको छ। शुक्रबार बिहान गौरीशंकर हाइड्रोपावरको हेड अफिसबाट करिब १०० मिटर तल करिब ३५ मिटर अग्लो पहिरो खस्दा खोला अवरुद्ध भएको हो। पहिरोका कारण खोलामा करिब १०० मिटर लामो र १५ मिटर गहिरो कृत्रिम ताल बनेको जिल्ला प्रहरी कार्यालय सोलुखुम्बुले जनाएको छ। ड्याममाथिबाट पानी विस्तारै बग्न थालेकाले तत्काल ठूलो जोखिम नरहेको प्रहरीले जनाएको छ। यद्यपि, कृत्रिम ड्याम जुनसुकै बेला फुट्न सक्ने सम्भावना रहेकाले तल्लो तटीय क्षेत्रमा सतर्कता अपनाइएको छ। प्रहरीले नदी किनारका बासिन्दा तथा नजिकका दुई हाइड्रोपावर आयोजनालाई उच्च सतर्कता अपनाउन आग्रह गरेको छ।