लागूऔषधसहित १५ जना पक्राउ

नियमित गस्तीमा खटिएको प्रहरीले काठमाडौँ, मोरङ, झापा, सुनसरी, दाङ, कपिलवस्तु र भक्तपुरका विभिन्न स्थानबाट लागूऔषधसहित १५ जनालाई पक्राउ गरेको छ। केन्द्रीय प्रहरी समाचार कक्षका अनुसार काठमाडौँको तारकेश्वर–७ मनमैजुबाट खैरो हेरोइन जस्तो देखिने पदार्थसहित ३६ वर्षीय उमेश मुखिया पक्राउ परेका छन्। मोरङबाट घनश्याम बस्नेत र झापाबाट सुवास राजवंशी पनि सोही प्रकृतिको पदार्थसहित पक्राउ परेका छन्। सुनसरीको इटहरीबाट चार, दाङको तुलसीपुरबाट दुई र लमहीबाट एक जना पक्राउ परेका छन्। कपिलवस्तुको कृष्णनगरबाट ब्राउनसुगर जस्तो देखिने पदार्थ तथा नगदसहित अर्जुन सुनारसहित तीन जना पक्राउ परेका छन्। भक्तपुरबाट चिकित्सकको सिफारिसमा मात्र खरिद गर्न पाइने ट्रामाडोलसहित सुरज लुइटेल र विदुर कार्की पक्राउ परेको प्रहरीले जनाएको छ।