धनकुटाका किसान किशोर भण्डारीद्वारा कम उत्पादन दिने जमिनबाटै राम्रो आम्दानी।

धनकुटाका किसान किशोर भण्डारीले तमोर नदीको बालुवायुक्त बगरमा व्यावसायिक कृषि गरी नयाँ दृष्टान्त प्रस्तुत गरेका छन्। सुरुमा पाँच रोपनीमा ड्रागन फल खेती थालेका उनले अहिले नौ रोपनीमा यसको विस्तार गरेका छन्। बजारमा राम्रो माग र प्रतिकिलो दुई सय ५० देखि तीन सय रुपैयाँसम्म मूल्य पाएपछि उनको आम्दानी बढेको छ।

ड्रागन फलको सफलतासँगै उनले एप्पल बयर, केरा, एभोकाडो र म्याकाडेमिया जस्ता बहुबाली खेतीसमेत सुरु गरेका छन्। युएनडीपी र पर्डेप नेपालको सहयोगमा सिँचाइ व्यवस्थापन भएपछि व्यवसाय अझ सहज भएको छ। हाल वार्षिक १५ लाख आम्दानी गरिरहेका उनको आगामी दिनमा करोडौँको कारोबार पुर्याउने लक्ष्य छ।