जिवनशैली

रघुगङ्गा हाइड्रोपावरले म्याग्दीमा निर्माण गरेको राहुघाट जलविद्युत् आयोजनाको सुरुङ प्रभावितलाई क्षतिपूर्ति वितरण सुरु

नेपाल विद्युत् प्राधिकरणको सहायक कम्पनी रघुगङ्गा हाइड्रोपावरले म्याग्दीमा निर्मित ४० मेगावाटको राहुघाट जलविद्युत् आयोजनाको सुरुङ खन्ने क्रममा विस्फोटनबाट घर भत्किएका र चर्किएका प्रभावितहरूलाई क्षतिपूर्ति वितरण प्रक्रिया अघि बढाएको छ।

सपना न्यौपाने

काठमाडौँ | २० कार्तिक २०८३, बिहीबार

म्याग्दीमा नेपाल विद्युत् प्राधिकरणको सहायक कम्पनी रघुगङ्गा हाइड्रोपावरले निर्माण गरेको ४० मेगावाटको राहुघाट जलविद्युत् आयोजनाको सुरुङ प्रभावितलाई क्षतिपूर्ति वितरण प्रक्रिया अघि बढेको छ।

६ किलोमिटरभन्दा लामो सुरुङ खन्ने क्रममा विस्फोटक पदार्थको कम्पनले क्षति पुगेका घरधनीलाई मङ्सिर ४ भित्र निवेदन दिन सूचना जारी गरिएको छ। ३५० भन्दा बढी घरमा क्षति पुगेको प्रारम्भिक विवरण छ, जसको मूल्याङ्कनपछि सरकारी मापदण्डअनुसार क्षतिपूर्ति दिइने प्रबन्ध सञ्चालक गणेश केसीले बताए।

भारतीय एक्जिम बैंकको सहुलियतपूर्ण ऋण र नेपाल सरकारको लगानीमा निर्मित यस आयोजनाले भौतिक संरचना निर्माण सम्पन्न गरी गत असोजदेखि परीक्षण उत्पादन सुरु गरिसकेको छ।