बाँकेस्थित अम्बे स्टिल सरिया कम्पनीमा आगलागी, आठ जना घाइते।

बाँकेको जानकी गाउँपालिका–५ स्थित अम्बे स्टिल सरिया कम्पनीमा आइतबार बिहान फलाम पगाल्ने भट्टीमा विद्युत् सर्ट सर्किट भई आगलागी हुँदा ८ जना घाइते भएका छन्। घाइते हुनेहरूमा बाँकेका ५ र भारतका ३ जना मजदुर रहेका छन्। गम्भीर घाइते दुई जनालाई थप उपचारका लागि भारतको लखनउ पठाइएको छ भने बाँकीको भेरी अस्पताल नेपालगञ्जमा उपचार भइरहेको छ।

प्रहरी, सशस्त्र प्रहरी, दमकल र स्थानीयवासीको संयुक्त प्रयासमा बिहान सवा ८ बजे आगो नियन्त्रणमा लिइएको थियो। २५ टन क्षमताका तीनवटा भट्टीमा भएको यस आगलागीबाट पुगेको अन्य क्षतिको पूर्ण विवरण भने आउन बाँकी रहेको प्रहरीले जनाएको छ।